“Í ár fagna ég 40 ára veru minni hér á Íslandi og stóran hluta af þeim tíma hef ég dúllað mér við að teikna, sumum til ama og öðrum til skemmtunar. Af því tilefni langaði mig að gefa fólkinu sem ég hef kynnst í gegnum tíðina og öðrum áhugasömum tækifæri til að skyggnast inn í sköpunargleði sem býr í mér því sumir þekkja mig sem myndskreyti, aðrir sem póstburðarmann eða bókaútgefanda, kokk, vatnslitamálara, málmsmið, kennara eða félagsliða og enn aðrir sem skapmikinn karakter sem liggur ekki á skoðunum sínum.”

Jean Antoine Posocco er fæddur í Frakklandi 1961. Hann kom til Íslands árið 1983 og menntaði sig frá árinu 1985-1989 í Myndlista- og handíðaskóla Íslands.

Hann setti fyrsta myndasögunámskeiðið á Íslandi af stað árið 1994 og tók við útgáfu hasarblaðsins Blek árið 1997 og hefur haldið ótrauður áfram að gefa það út undir nafninu NeoBlek. Hann hefur tekið virkan þátt í myndlistarlífi með einka- og samsýningum auk þess sem myndasögur eftir hann hafa birst í dagblöðum og tímaritum.

Sýningin stendur til og með 19. nóvember. Opið alla virka daga, nema miðvikudaga milli kl 14:00 og 18:00 en á milli kl. 12:00 og 17:00 um helgar.