Löng helgi #3 opnaði  í Miðgarði á Hvolsvelli föstudaginn 27.janúar kl 17. Sýningunni lýkur sunnudaginn 29.janúar kl 17.

Löng helgi #3 er þriðji hlutinn í röð samsýninga sem hófst á Oddsson hostel við Hringbraut í Reykjavík haustið 2021. Annar hluti opnaði á Hótel Hafnarfjalli við Borgarnes í lok janúar 2022.

Löng helgi er könnun á næmi og ofnæmi í breyttri heimsmynd þar sem tími og rými hafa öðlast aðra merkingu. Verkin á sýningunni leysa úr læðingi eiginleika og ágenga strauma sem leynast í loftinu og leita stöðugt á okkur í bilinu milli ákveðinnar fjarlægðar og sjaldgæfrar nándar. Hvert verk mælir sér mót við sýningargestinn úr óvæntri átt og leiðir um innviði gistiheimilisins frá einum kringumstæðum yfir í aðrar.

Staðsetning sýningasyrpunnar Löng helgi á yfirgefnum, afviknum eða tímabundið lokuðum gistiheimilum er afgerandi undirtónn verkanna sem mynda marglaga og hugvekjandi tengsl sín á milli í nánu samtali við sýningargestinn.

Þátttakendur í Löng helgi #3 eru Ásta Fanney Sigurðardóttir, Eygló Harðardóttir, Freyja Eilíf, Friðgeir Einarsson, Gígja Jónsdóttir, Haraldur Jónsson, Logi Bjarnason, Logi Leó Gunnarsson, Margrét Helga Sesseljudóttir, Serge Comte, Sólbjört Vera Ómarsdóttir, Sigrún Hlín Sigurðardóttir, Stefán Hermannsson, Una Margrét Árnadóttir og Örn Alexander Ámundason.