Sunna Svavarsdóttir útskrifaðist með BA gráðu í ArtScience frá Royal Academy of Art í Haag árið 2019. Hún hefur undanfarið einbeitt sér að innsetningum þar sem gestum er boðið að taka þátt og hvatt til þess að loka augunum, snerta og lykta. Innsetningin ‘weight series’ er hluti af áframhaldandi rannsókn sem fjallar um hreyfiorku líkamans með hjálp þyngdar. Uppruni hugmyndarinnar var að endurframkalla líkamlega tilfinningu þegar þungum hjálmi er lyft af höfði og líkaminn þarf smá tíma til þess að endurstilla sig. Slík upplifun varir oftast ekki lengur en nokkrar sekúndur og gæti því auðveldlega farið framhjá okkur en í verkunum býðst gestum tækifæri til að dvelja um stund í þessu augnabliki afmarkaðrar skynjunar.